ამირან სალუქვაძე: პოლიტიკურ უტიფრობას და აღვირახსნილობას არ იღებს მოსახლეობა

ამირან სალუქვაძე: პოლიტიკურ უტიფრობას და აღვირახსნილობას არ იღებს მოსახლეობა




ამირან სალუქვაძე (ანალიტიკოსი):

სააკაშვილის შესახებ კიდევ ორ სიტყვას დავწერ და წელს საკმარისია.
არც გაისად იქნება საინტერესო, თუმცა ზოგიერთ საკითხზე აუცილებელი იქნება საუბარი.

1. სააკაშვილის ხელისუფლების დანაშაულებისთვის გასამართლებულია 150-დან 200-მდე მაღალჩინოსანი: პრემიერ-მინისტრი, მინისტრები და მათი მოადგილეები, დეპარტამენტების დირექტორები და მათი მოადგილეები,  სამმართველიების უფროსები და მათი მოადგილეები.
ბევრმა უკვე მოიხადა სასჯელი, ბევრი იხდის, ზოგი ძებნაშია, ზოგის სასამართლო პროცესი გრძელდება.
გვარებს არ ჩამოვთვლი, ვინც უკვე იჯდა, ან ზიან.
უმეტესობა დანაშაულებს არ აღიარებს, მაგრამ სასჯელი მხნედ მოიხადეს ან იხდიან.
რა უბედურებაა ყოველ დღე ჯანმრთელობაზე საუბარი?! ორი შავფორმიანი შევიდა, წნევამ აუწია, თვალები დაუბინდდა, სუსტადაა, ვერ დგება და ა.შ. კუჭის მუშაობის პრობლემებიც კი საჯაროდ გამოაქვთ.
მას არ რცხვენია, მაგრამ თქვენ არაფერს გრძნობთ?!
ვერ ხვდებით, რომ პოლიტიკური ლიდერი ბელადად აქციეთ, ბელადომანიიდან კი რელიგიაში გადაგეზარდათ?
წნევის კონტროლი კი არა, ნეკნებს ულეწავდით ხალხს და კვნესის უფლებას არ აძლევდით.
სააკაშვილს თავზე ევლებოდა მთელი სამხედრო ჰოსპიტალი, 40 დღე ყველა ყირაზე იდგა მის გამო და ბოლოს ჰოსპიტალსაც, მედპერსონალსაც შეურაცწყოფა მიაყენეთ.
2. როგორ გგონიათ, ვინც სასჯელი მოიხადა და იხდის, მხოლოდ მათი ბრალეულობისთვის მოიხადეს ან იხდიან?
იმ 150-200 მაღალჩინოსნის დანაშაულებში სააკაშვილის პირადი წილიცაა. სააკაშვილის პრეზიდენტობის დროს, მისი უშუალო ჩართულობით შექმნილი დანაშაულებრივი სისტემის პირობებში ჩაიდინეს დანაშაულები. მათ მიერ ჩადენილ დანაშაულებში ბრალი მაშინდელ პრეზიდენტსაც მიუძღვის.
3. თავად ტერმინიც "სისტემური დანაშაულები" სისხლის სამართლის კოდექსით სასჯელს არ ითვალისწინებს და მხოლოდ პოლიტიკური შეფასებაა.
თუმცა პოლიტიკოსისთვის, პოლიტიკური პარტიისთვის იმდენად მძიმე შეფასებაა, რომ, წესით, დიდი ხნის წასულები უნდა იყვნენ პოლიტიკიდან.
სწორედ ამ პოლიტიკურ უკულტურობას, მეტიც, პოლიტიკურ უტიფრობას და აღვირახსნილობას არ იღებს მოსახლეობა.
არავის აქვს სააკაშვილის ან ვინმეს ციხეში ჯდომის ინტერესი. თუმცა, სასჯელს სახდელი უნდა ახლდეს. ეს აქსიომაა.
მაგრამ, თქვენ, ვინც ასეთ ცრუ აჟიოტაჟს ახვევთ თავზე მოსახლეობას, ყველაფერს აკეთებთ იმისათვის, რომ ხალხში თანაგრძნობის ნაცვლად, მეტი გულგრილობა გაჩნდეს სააკაშვილთან მიმართებაში.
18 წელი იყავით ხელისუფლებაში (დიახ, შევარდნაძის პერიოდშიც თქვენ იყავით), 9 წელი ოპოზიციაში და ქართველი ხალხი ვერ შეიცანით.
დღეს ამტკიცებთ: გირგვლიანი პიარული სახელია; მოლაშვილი პოლიტიკური ნიშნით არ უწამებიათ; თეთრაძეს, ალბათ, წნევამ აუწია და გული წაუვიდა, თქვენ მის სიკვდილთან არ ხართ კავშირში; რობაქიძე მოგონილია; ხარძიანი მოგონილია (ვრცელი სიაა); ომის წინ კეზერაშვილი და მისი წინამორბედი ჯარის ხარჯზე არ გამდიდრებულა; 180 სამხედრო ომის შემდეგ ციხეში არ ჩაგისვამთ, თქვენი უცოდინარობის გადასაფარავად; "სამხრეთ ოსეთი" არ აღგიდგენიათ; რუსეთისთვის სტრატეგიული ობიექტები არ გადაგიციათ; რკინიგზის მიყიდვას არ აპირებდით; "ვტო"-ში არ შეგიშვიათ; წინასაარჩევნოდ რუსეთს არ ეტენებოდით; ცალ-ცალი კალოშით მოსულებს მილიონები არ დაგიგროვებიათ; მსხვილ ბიზნესებს და უზარმაზარ ქინებას არ ფლობთ; არ დაგირბევიათ; მედია არ მიგითვისებიათ; თავისუფალი სიტყვა არ ჩაგიქოლავთ; ათასობით ადამიანი არ დაგიმცირებიათ; ციხეებში არ გიწამებიათ; მოსახლეობა თქვენს დროს თურქეთში და სხვა ქვეყნებში სამუშაოდ არ გადახვეწილა; ტოტალური მოსმენები არ გიწარმოებიათ...
ყველაფერი მოგვეჩვენა.
სისტემური დანაშაულები კი არა, წინა ხელისუფლება იყო დანაშაულებრივი ორგანიზებული დაჯგუფება და ყველა დანაშაული ამ ჭრილში უნდა იქნას განხილული.
4. კიდევ ერთი ბოდვა. სააკაშვილს ცხოვრება აწყობილი ჰქონდა და ჩვენს გადასარჩენად ჩამოვიდაო.
გადასარჩენი ჩვენ ვიქნებოდით, 1 ოქტომბერს რომ არ აეყვანათ და მისი გეგმა რომ მოეყვანა სისრულეში.
საქმეების შეკერვა არ იციან, თუ წლებია შავ სიებს არ აგროვებენ ყველა ჩვენთაგანის შესახებ, ვინ რას წერს, ამბობს, "ალაიქებს?!"
ჩამოვიდა ქვეყნის ასარევად. ვინ დააკვალიანა, ბიძამ, გარემოცვამ, ინვესტორებმა თუ თავისით გადაწყვიტა, ოდესმე გაირკვევა, მაგრამ მეცხრეხარისხოვანია.
ჩამოვიდა მისი პოლიტიკური ამბიციების დასაკმაყოფილებლად და მიზნების მისაღწევად. ზღაპრები მოუყევით საკუთარ მომხრეებს.
5. ფსიქოთერაპიული მკურნალობა სააკაშვილს კი არა, მოსახლეობის დიდ ნაწილს ესაჭიროება, თქვენი მავნე ზეგავლენის გამო.
სტრესებში, ფსიქოლოგიურ და საინფორმაციო ტერორში აცხოვრებთ მოსახლეობას: ხელისუფლებაში ყოფნის დროს ჭარბ კეთილდღეობას ხატავდით, შემდეგ კი ყველაფერს აკეთებთ ხალხის, ეკონომიკის დეპრესიაში ჩასაგდებად.
თქვენთვის არ ვწერ. თქვენ ვერ გაიგებთ.