ბიძინა ივანიშვილი: დახელოვნდნენ ოპონენტები თეთრის შავად, სიკეთის ბოროტებად წარმოჩენაში

ბიძინა ივანიშვილი: დახელოვნდნენ ოპონენტები თეთრის შავად, სიკეთის ბოროტებად წარმოჩენაში

„ისე დახელოვნდნენ ოპონენტები თეთრის შავად, სიკეთის ბოროტებად, შენების ნგრევად წარმოჩენაში, რომ მიწევს წინასწარ დავაანონსო გარკვეული პროექტები, მათ შორის წყალტუბოც, რათა საზოგადოებამდე თავიდანვე სწორი და პირუთვნელი ინფორმაცია მივიდეს” - განაცხადა  „ქართული ოცნება-დემოკრატიული საქართველოს“ თავმჯდომარე ბიძინა ივანიშვილმა ჟურნალ „Entrepreneur“-სთვის მიცემულ ინტერვიუში. 
მისი თქმით, თავს არ გრძნობს კომფორტულად იმის გამო, რომ წინასწარ უწევს სამომავლო პროექტებზე საუბარი. 
„ნამდვილად არ ვგრძნობ თავს კომფორტულად, როცა წინასწარ მიწევს სამომავლო პროექტებზე საუბარი. საქმემან შენმან გამოგაჩინოსო, ნათქვამია და ამ პრინციპს მივდევდი ყოველთვის, მაგრამ ცხოვრებამ აქაც თავის კორექტივი შეიტანა” - განაცხადა ბიძინა ივანიშვილმა.
ბიძინა ივანიშვილი წყალტუბოს განვითარების პროექტზე - იქნება ტენდერი თუ აუქციონი, ამას სახელმწიფო კანონის გათვალისწინებით განსაზღვრავს. მეც და ყველა დაინტერესებული პირი მას დავემორჩილებით
“წყალტუბოს სასტუმროები ღია აუქციონზე, მკაცრი საინვესტიციო პირობებით გაიყიდება. მხოლოდ ორი მთავარი მოთხოვნა და თხოვნა მექნება – ეს არის ვადები, რომ მაქსიმუმ 3 წელიწადში ობიექტი უნდა დასრულდეს და რეაბილიტაცია არსებული კულტურულ-ისტორიული იერსახის შენარჩუნებით განხორციელდეს“ - ამის შესახებ „ქართული ოცნება-დემოკრატიული“ საქართველოს თავმჯდომარე ბიძინა ივანიშვილმა ჟურნალ „Entrepreneur“-სთვის მიცემულ ინტერვიუში, წყალტუბოს ობიექტების გამოსყიდვის შესახებ დასმული კითხვის პასუხად  განაცხადა. 
მისი თქმით, საინვესტიციო პაკეტი მალე უნდა გამოცხადდეს. 
 „სწორი იქნება და უნდა შევეცადოთ, რომ ცალ-ცალკე გამოვიდეს ობიექტები, რათა ვისაც რა უნდა, ის შეიძინოს. იქნება ტენდერი თუ აუქციონი, ამას სახელმწიფო განსაზღვრავს, როგორც ამას კანონი ითვალისწინებს და, რა თქმა უნდა, მეც და ყველა დაინტერესებული პირი მას დავემორჩილებით.“ - აცხადებს ბიძინა ივანიშვილი. 
მისი თქმით,  წყალტუბოს განვითარების პროექტის ინიცირება დიდწილად აბასთუმნის დადებითმა გამოცდილებამ განაპირობა. 
„შეიძლება ითქვას, აბასთუმნის მაგალითმა გამათამამა და გადამაწყვეტინა, იგივე ტიპის, თუმცა კიდევ უფრო მასშტაბური პროექტის განხორციელება” - აცხადებს ბიძინა ივანიშვილი.