მამუკა ბახტაძე: მთაში საწარმოებისა და ფერმერული მეურნეობების განვითარებისთვის საინვესტიციო პროგრამები შემუშავდება

მამუკა ბახტაძე: მთაში საწარმოებისა და ფერმერული მეურნეობების განვითარებისთვის საინვესტიციო პროგრამები შემუშავდება

მთის საკითხებზე მუდმივად მუშაობს მთის ეროვნული საბჭო და მაღალმთიანი დასახლებების განვითარების ფონდი, რომელმაც მთაში ინფრასტრუქტურული პროექტების დასაფინანსებლად 66 მლნ ლარი უკვე გამოყო, – ამის შესახებ საქართველოს პრემიერ-მინისტრმა, მამუკა ბახტაძემ განაცხადა, რომელმაც საქართველოს მთავრობის მაღალმთიანი რეგიონების განვითარების 2019-2023 წლების სტრატეგიის მთავარი მიმართულებები წარადგინა.

მისი თქმით, გარდა ამისა, მთის სტაბილური და შეუქცევადი განვითარებისთვის საჭირო გახდა გრძელვადიანი სტრატეგიის შემუშავება.

„ჩვენ ვისურვებდით, რომ ასეთი სტრატეგია საქართველოს ჰქონოდა დამოუკიდებლობის დღიდან. ეს საშუალებას მოგვცემდა, გაცილებით ადრე გადაგველახა ბევრი პრობლემა, რომელიც დგას მთის წინაშე, მაგრამ დარწმუნებული ვარ, სტრატეგია საშუალებას მოგვცემს, ჩვენ ძალიან მოკლე ვადაში აღმოვფხვრათ ყველა ძირეული პრობლემა“, – განაცხადა მამუკა ბახტაძემ.

მისი თქმით, მაღალმთიანი დასახლების სტატუსი მინიჭებული აქვს 1 730 დასახლებას, მთის 300 ათასზე მეტი მაცხოვრებლისთვის რეალობა მნიშვნელოვნად შეიცვალა, რაც მოსახლეობის თითქმის 10 პროცენტია.