თამარ მახარობლიძე: მნიშვნელოვანია, რომ მოკლული მოზარდის მამა სასამართლოს ენდობა

თამარ მახარობლიძე: მნიშვნელოვანია, რომ მოკლული მოზარდის მამა სასამართლოს ენდობა

სამართალმცოდნე თამარ მახარობლიძე სოციალურ ქსელში სააპელაციო სასამართლოს მიერ ხორავას ქუჩაზე მომხდარი მკვლელობის საქმეზე პირველი ინსტანციის სასამართლოს განაჩენში შეტანილ ცვლილებებს ეხმაურება:

ძალიან მნიშვნელოვანია, რომ მოკლული მოზარდის მამა სასამართლოს ენდობა და ხედავს სამართლის აღსრულების რეალურ შანსს.

გამოძიება უნდა გაგრძელდეს მანამდე, სანამ ამ საქმეზე მართლმსაჯულება სრულად არ აღსრულდება და დაზარალებულთა და საზოგადოების ყველა შეკითხვას ამომწურავი პასუხი არ გაეცემა. საქმის საბოლოოდ დასრულების მოლოდინი არის ძალიან დიდი, რაც შეძლებისდაგვარად შემჭიდროვებულ ვადებში უნდა მოხდეს.

და კიდევ, არც საკანონმდებლო და არც აღმასრულებელი ხელისუფლების კომპეტენცია არ არის სასამართლო განაჩენის დეტალების განხილვა და შეფასება. საკანონმდებლო ხელისუფლების ფუნქციაა კანონშემოქმედება, რომლის შედეგად მიღებული კანონმდებლობით სასამართლო ხელმძღვანელობს საქმის განხილვის დროს, ისევე როგორც აღმასრულებელი ხელისუფლების ვალდებულებას წარმოადგენს განაჩენის აღსრულება.

შეგახსენებთ, დღეს თბილისის სააპელაციო სასამართლომ ხორავას ქუჩაზე მომხდარი მკვლელობის საქმეზე პირველი ინსტანციის სასამართლოს განაჩენში ცვლილებები შეიტანა. სააპელაციო სასამართლომ დავით სარალიძის ჯგუფურად მკვლელობაში გ.ჯ. დამნაშავედ ცნო.