ვახტანგ გომელაური: კრიმინალი შემცირებულია

ვახტანგ გომელაური: კრიმინალი შემცირებულია

საქართველოს შინაგან საქმეთა მინისტრი ვახტანგ გომელაური აცხადებს, რომ საქართველოში ბოლო პერიოდში კრიმინალური შემთხვევები სტატისტიკურად შემცირებულია.

როგორც ვახტანგ გომელაურმა ჟურნალისტებს განუცხადა, კრიმინალის მატების შესახებ ცრუ ინფორმაცია ვრცელდება.

„არაფერი მომატებული არ არის. ეს არის ცრუ ინფორმაციები. ერთეული შემთხვევები იყო. მთლიანად სტატისტიკით ბევრად დაკლებულია რიცხვები, ბევრად დაბალია. სამჯერ მეტი პოლიციელია გამოსული დღეს, თუ იყო 10 პოლიციელი ერთ-ერთ ობიექტზე, დღეს 30 პოლიციელი დგას. აქედან გამომდინარე, დაკლებულია კრიმინალი. ასე რომ, რაღაც განსაკუთრებული არ ხდება. ყველაფერი შეიძლება, მოხდეს. მარნეულშიც შეიძლება მოხდეს, გორშიც და თბილისშიც ხდება, მაგრამ თუ ხდებოდა 10, ახლა ხდება სამი-ოთხი“, – განაცხადა ვახტანგ გომელაურმა.

კითხვაზე, აქვს თუ არა უწყებას საკმარისი რესურსი ქვეყანაში სიტუაციის გასაკონტროლებლად, ვახტანგ გომელაურმა აღნიშნა, რომ ამის რესურსი არსებობს.

„ჯერჯერობით არ გვჭირდება. საკმარისი რესურსები გვაქვს ჩვენ, თავდაცვასაც. მმართველი გუნდი მუშაობს პარლამენტთან ერთად, ყველანი ჩართულები ვართ“, – აღნიშნა ვახტანგ გომელაურმა.